اسلام آباد، 14 جولائی 2026: وفاقی وزیر و چیئرمین پارلیمانی کمیٹی برائے کشمیر، رانا محمد قاسم نون نے آج پارلیمانی کمیٹی برائے کشمیر کے دفتر میں ایم کیو ایم پاکستان کے سینئر رہنما و رکنِ قومی اسمبلی ڈاکٹر فاروق ستار سے ملاقات کی۔ اس موقع پر سابق وفاقی وزیر امین الحق، زاہد ملک، شاہ فیصل اور سندس ملک بھی موجود تھیں۔

ملاقات کے دوران رانا محمد قاسم نون نے مسئلہ کشمیر پر اپنے خیالات کا اظہار کرتے ہوئے کشمیری عوام کی بے مثال قربانیوں کو خراجِ تحسین پیش کیا۔ انہوں نے کہا کہ پاکستان نے ہر محاذ پر کشمیری عوام کی سیاسی، سفارتی اور اخلاقی حمایت جاری رکھی ہے۔ انہوں نے معرکۂ حق میں بھارت کے خلاف پاکستان کی کامیابی کو ایک تاریخی کامیابی قرار دیتے ہوئے کہا کہ یہ پوری قوم کے لیے باعثِ فخر ہے۔ انہوں نے مزید کہا کہ کشمیری حریت قیادت گزشتہ کئی برسوں سے بھارتی جیلوں میں قید ہے، جبکہ بھارت غیر قانونی طور پر بھارتی غیر قانونی زیرِ تسلط جموں و کشمیر (IIOJK) میں جعلی ڈومیسائل جاری کر کے مقبوضہ علاقے کی آبادی کا تناسب تبدیل کرنے کی کوشش کر رہا ہے، جو بین الاقوامی قوانین اور اقوامِ متحدہ کی قراردادوں کی صریح خلاف ورزی ہے۔

 

رانا محمد قاسم نون نے اس موقع پر زور دیتے ہوئے کہا کہ مسئلہ کشمیر کو مؤثر انداز میں اجاگر کرنے کے لیے قومی سطح پر ایک "قومی کانفرنس برائے کشمیر" کا انعقاد ضرور ہونا چاہیے۔ انہوں نے کہا کہ اس کانفرنس میں تمام سیاسی جماعتوں، پارلیمنٹ کے اراکین، ماہرین، دانشوروں، سول سوسائٹی، نوجوانوں اور کشمیری قیادت کو یکجا کیا جائے تاکہ مسئلہ کشمیر پر قومی اتفاقِ رائے کو مزید مضبوط بنایا جا سکے اور عالمی سطح پر کشمیری عوام کا مؤقف مؤثر انداز میں پیش کیا جا سکے۔

سندس ملک نے بھی مسئلہ کشمیر پر اپنے خیالات کا اظہار کرتے ہوئے کہا کہ مسئلہ کشمیر کو عالمی سطح پر مزید مؤثر انداز میں اجاگر کرنے کی ضرورت ہے۔ انہوں نے کشمیر کاز کے لیے رانا محمد قاسم نون کی مسلسل کاوشوں کو سراہا۔

 

ڈاکٹر فاروق ستار نے اپنے خطاب میں کہا کہ ایم کیو ایم پاکستان کی اس کمیٹی میں نمائندگی موجود نہیں جو مسئلہ کشمیر پر کام کر رہی ہے، جبکہ اس قومی مسئلے پر تمام سیاسی جماعتوں کی مؤثر شمولیت ضروری ہے۔ رانا محمد قاسم نون نے اس تجویز کی تائید کرتے ہوئے کہا کہ کشمیر کے معاملے پر قومی یکجہتی اور وسیع تر سیاسی اتفاقِ رائے وقت کی اہم ضرورت ہے۔ ڈاکٹر فاروق ستار نے مزید کہا کہ مسئلہ کشمیر کا پائیدار حل سیاسی اور سفارتی ذرائع سے ہی ممکن ہے۔

 

رانا محمد قاسم نون نے ایم کیو ایم پاکستان کی عوامی خدمات، بالخصوص تعلیم کے شعبے میں اس کی خدمات کو سراہتے ہوئے کہا کہ تعلیم کے فروغ کے لیے جماعت کی کوششیں قابلِ تحسین ہیں۔

 

ملاقات کے اختتام پر وفاقی وزیر و چیئرمین پارلیمانی کمیٹی برائے کشمیر رانا محمد قاسم نون نے معزز مہمانوں کو گلدستے اور یادگاری کشمیری اسکارف پیش کیے۔